خرافات الأجانب..ماسارو إيموتو نموذج

من طرف **سامح عسكر** الثلاثاء يونيو 06, 2017 9:12 pm

يوجد عالم ياباني إسمه.."ماسارو إيموتو"

قال كلمة هزت الأوساط العلمية وجعلت إينشتاين لو شاف هذا الرجل يروح يخنقه أو يفكر ينتحر، وبما أن ماسارو عالم ياباني فكلمته وجدت رواج بين السلفيين خصوصا الفيديو الشهير للشيخ العريفي وهو يتلوى ويكذب لإثبات أن القراءة على الماء شئ علمي..

ماذا قال ماسارو؟

قال: أن جزيئات الماء تتأثر بالكلام الجيد والسئ عند الإنسان، يعني لو مسكت كوباية مياه وقلت فيها .."ياوسخ يابن الكلب"..وبعدين كوباية تانية وقلت فيها .." ياجميل ياسكر يام عيون زرقا"..سنجد أن الماء في كلا الكوبين اختلف عن بعضه سلبا وإيجابا..هنا جزيئات الماء أصبحت جيدة مفيدة للجسم..وهنا جزيئات الماء أصبحت قبيحة ومضرة..

من هذه القاعدة أخذ السلفيين كلام الرجل وروجوه على طريقة النصاب زغلول النجار أنه إثبات علمي بصحة القراءة على الماء، وبالتالي ممكن تقرأ على جركن مياه وتبيعه للغلابة تحت عنوان.."ماء مقري"..زي ما بيحصل في السعودية بالضبط ورزق الهبل على المجانين

المشكلة إن ماسارو دا- العالم الياباني- طلع لا عالم ولا حاجة..معاه دكتوراة في الطب البديل من جامعة غير معترف بها علميا في الهند، ونظريته أول ما طلعت جعلت العلماء يلطموا خدهم ويشقوا جيوبهم كأن مات لهم ميت..!..إيه اللي انت بتعمله دا يامجنون..هذا يشرعن التجارة بالماء، وكل واحد له مصلحة ممكن ينصب ع الخلق..

كان من العلماء اللي ردوا عليه.."وليم ريفيل"..و.."تايلر فولك"..وستيفين كيسلينج"..

حتى فيه شخص إسمه جيمس راندي تحداه بإثبات كلامه بالتجربة أو تقديم قرائن وشواهد للنظرية ووعده بمليون دولار، لكن الحاج ماسارو ماعرفش

الخلاصة: ماسارو هذا شخص عادي زي عبدالعاطي كفتة عندنا، مهووس بالطب البديل، لكن عشان مولود في اليابان وأخد شهادة من كلية غير معترف بها علميا أصبح عالم (ياباني) لا يشق له غبار..اليابان كلها بتتكلم..واحنا عارفين سمعة اليابان إيه..وفرحة العريفي لا توصف لأنه أثبت بالتجربة إن كل من اشترى ماء مقري عليه في السعودية ماطلعش حمار..!!!