موسوعة أشعار صلاح جاهين

انغام سبتمبرية


وقـف الـشريـط فى وضـع ثـابـت
دلـوقـت نـقـدر نـفـحـص المنظر
مـفـيـش ولا تـفـصـيـلة غـابت
وكـل شـىء بـيـقــول وبـيـعـبر
مــن غـيــر كــلام ولا صـوت
أول مــا ضــغــط الــمــوت
بـخـفـة وبجبـروت فـى يـوم أغبر
عــلـى زر فــى الـمـلـكــوت
وقــف الـشـريـط فـى وضـع ثابت

دلـوقـت نـقـدر نـفـحص الصورة
انـظـر تـلاقـى الـرايـة منـشورة
مِتْمَزّعــة لـكـن مـا زالـت فـوق
بـتـصـارع الـريـح اللـى مسعورة
وانــظــر تــلاقـى جــمــال
رافــعــهــا بــاسـتـبـســال
ونـزيــف عـرق سـيال على القورة
وف عـنــفــوان الــنــضــال
وقـف الـشـريـط فـى وضـع ثابت

انـظـر الـيـه شـوف قبضته السمرة
وعـيـونـه ثـورة مـكـحلـة بثورة
وصـدره عرض الأرض حاضن مصر
والـشـام وليـبـيا وتـونس الخـضرة
والـقــصــبـة وفــلسـطـيـن
والأردن الـمـــســـكـيــــن
والـبـحـر والـبـسـاتـين والصحرا
وف عـــز طـحـن الـسـنـيـن
وقــف الـشـريـط فـى وضع ثابت

انـظـر وشـوف ع المـهل بالـراحة
الـشـمـس وسـط الـقـبـة قداحـة
ونـاس بعـيد فـى الـظـل مرتـاحة
ومـصـر واقـفـة صـبـية فـلاحـة
عـلــى كـتـفـــهـا بـــلاص
فـيـه ألــف تــقـب رصــاص
والـمـــيـه مـــنـه خــلاص
شـــلالها فـى الرمـل غــــاص
صـبـيـة حـلـوة كـأنـهـا تـفاحة
لـكـنــهـا م الـحــزن دابــت
وســط الســواد نــدابـة نـواحة
ولـمـا هــل بـطـلـها فى الساحة
بـــالـحــب والاخـــــلاص
وقـــف الــشريـط فى وضع ثابت

خـلـى الـمـكـنجـى يـرجع المشهد
عــايز أشـوف نفسى زمان وانا شب
داخــل فـى رهـط الـثـورة متنمرد
ومــش عـاجبــنى لا مـلك ولا أب
عـايز أشـوف مـن تـانى واتـذكـر
لـيـه ضـربة من ضربـاتى صابت؟
وضـربـة مـن ضـربـاتـى خـابت
وضربة وقفت بالشريط فى وضع ثابت؟

قــال المـكـنـجـى: رجـوع مفيش
عـيـش طـول مـافـيك أنفـاس تعيش
وبــــــص شـــــــوف ..
ركــن الشـباب صفـوف صـفـوف
ركـن الشـباب فـى السيـنما بيـصفر
مــفــــيـــش وقـــــوف
ركـن الشبـاب فـيه ألـف مليون شب
ومـش عــاجبـهم لا مـلك ولا أب ..
انــــظــــر إلـيـــهـــم
وأنــــــت تــتــذكـــــر

بكائية


جـايه عـروس الشـعر م البـغـالة
بمـلايـة لـف وكـف مـتـحـنـى
شـافت صـوان وحبـال وناس شغالة
وأنـا بـابـكى جنب البـاب ومستنى
والشـمـس تقـطر حزن ع الصبحية

ميـن اللى مـات يـا شب يابو دموع
قـالـت عروس الشـعر للمـوجـوع
مين اللى مات يا شب، قل لى يا خويا
قـالت عروس الشعر .. لا يكون ابويا
أنـا قـلـت ابـونا كلـنا يـا صبية

مــات زى مـا كتـف الجـبل ينهد
مـات باقـتدار وفـخار مـاقالش لحد
بيـرم .. ومات ماشى ف طريق الجد
وجـنازتـه ماشية أهه فى شارع السد
والنعـش عـايم فى الدموع فى عينيا

فـايت فـى قـلب القـاهرة ومـعدى
هـو عـارفها وهـى مـش عـارفاه
عـلى كـل حـاره وكل عطفة يهدى
كـأنـه راجـع لـسـه مـن منـفاه
بيــبوس بعـيـنه اللِـبْـدَة والجلبيه

ده القـبـر ده .. والا كـمـان منـفى
طـالـع علـيه الشـوك والـحـلفا
ده الـقـبـر ده .. والا كـمان تَبعيده
حـدفـوه علـيـها كلمتين فى قصيدة
بيـرم .. فتـحت ديـوانـه رد علـيا

بكائية نزل المسيح


نـزل الـمـسـيح مـن ع الصليب
نـزل ونــام
فى مرج دمـع
من غير قميص
وتـلـج شـمع
والمـجـدليه تميل عليه وتنوح تنوح
تـنـده علـيه
تـلاغـيـــه
تــولــــول
تـحـضـــنه
تـنـدب عـليـه وكأنـها بتـهنـنه
تـجـدل لـه مهده من جدايل شعرها
وتدفنه فى صدرها
ما رضعش منها إلا جرح من الجروح

بكائية إلى ناظم حكمت


مت متأثر بجرحك القديم؟ ..

بعد ما قلنا خلاص،

عم ناظم طاب، وقاعد فى الجنينه،

يقرأ فى الجرنال، ويكتب جوابات …

قالوا: مات.

مش خلاص كنا انتهينا؟ ..

مش مسحنا مطرح القضبان بتبسيمة عينينا

مش دواك جبناه من الهند، من الصين واليابان،

من بلاد التلج، من باندونج وجزيرة سيلان،

من هنا فى القاهرة؟ ..

مش صحيت، ومشيت، وجيت طليت علينا؟ ..

من سنه، ومش جيت وطليت ع الغيطان،

ولقيتها بين ايدين الفلاحين؟ ..

من سنه، مش جيت وطليت ع المصانع،

ولقيتها بين ايدين العاملين؟ ..

من سنه، مش جيت ودورت هنا

ع الولد، اللى فى قصيدتك "بور سعيد"

قلبه كان تفاحه خضرا، ومات شهيد ..

مش لقيته من جديد؟ ..

ولقيت قلبه حديد؟ ..

ولقيت شعرك على لسانه نشيد؟ ..

ولقيت شعرك ، بيتجسد على مر الزمان؟ ..

ليه تموت يا عم ناظم.

قبل ما "أزمير" تغنى لك كمان! ..

كنت عشت.

كل شىء وله أوان …

"جومو كينياتا" انت فاكره؟ ..

كان زميلك فى ضلام الزنانين،

أنتوا لاتنين كنتو من حبة سنين.

دمعنا المر السخين،

قلبنا الحر الحزين ..

مش خرج م السجن، والحق انتصر؟ ..

مش حكم "كينيا" بإسم الملايين؟ ..

مش خرج "بن بللا" م السجن ورفع راية "الجزاير"
"واليمن" مش جالها يوم؟ ..

انما برضه انت شاعر،

قلبك الحلو معذب وكظيم.

لسه فى استانبول، بيشحن فى البواخر،

ويا عمال الموانى ..

لسه فى "الأناضول"، بيتكلم مع فلان الفلانى ..

لسه بيعانى الأمانى،

لسه بيغنى: "أمان" ليل بعد ليل ..

شجر البندق عطش ع "الدردنيل".

جفت الأغصان، بقت شكل الخناجر،

وأنت شاعر،

قلبك البلبل، حضنها ومات، مهاجر ..

يه يا ناظم يا عظيم،

جرحك اللى مت بيه، مش القديم! ..

بكائية إلى جون كنيدى


يعنى كان لازم تطاطى وتغسل الرجلين يا "جون"؟

يعنى كان لازم يفيض بيك الكرم، وتفيض بروحك ع الغيطان

يعنى كان لازم تموت؟ ..

علشان أفتح محارة قلبى عن كلمة حنان ..

مرة فى العمر، لمليونير من البيض الجبابرة الأمريكان

بس إنسان؟..

أه لو الانسان يشوف التانى إنسان قبل ما يفوت الأوان

آه .. وآه ..

لعنة الله ع الحياة،

لو تكون ستار ولازم يتمزع علشان مابنى آدم يبان ..

رحمة الله على الشرف،

لو يكون نجمة "شريف"، لابد يخرمها الرصاص،

لجل يخرج م الرعاة، راعى يبشر بالخلاص.

وسلام الله على جسد الشهيد،

الوليد،

اللى عمدوه بدمه،

وانتزع من حضن أمه،

واترسم قديس عريس فى "روحانيات" الزنوج …

"جون" يا "جون"

يابو الجراح،

"جون" يا "جون"

نام فى أمان،

شعلة الحرية وقعت ع التلوج

فى بحيرة ميتشجان

واشتراكى عربى وأفريقى، ناح

وانتحب ع "الساكسفون"

مرة فى عمر الزمان ..

"جون" يا "جون" روحك مياه

بلورية، صافية، دافية، جايه من كل اتجاه

زى ما تكون دمعة واحدة، كبيرة، قد الكون يا "جون"

يا "يوحنا المعمدان"

بكره أجمل من النهارده


حـبلت النـسـوان تـسع تشهر طوال
راحـت الأيام وجـت كـبروا العـيال
أصبحوا الصبيان رجال
والبنـات طلـعت على صدورهم ......
واستحق لهم جــواز
نـسـجوا توب الفرح من نور عينـيهم
غـرزوا الأزهـار فى ديـل الفساتـين
بــســاتــيــن
رفعوا الصبـيان إيديهم
بالشاكوش والمسطرين
عملوا البيـت والجهاز
رفعوا القـاس والكـوريك فى الفلاحـين
جـهزوا الصنــدوق ورجعوا بالطحين
واشتروا حلقان خـرز
والـزمـن فــات ... فـات سنـيـن
تحبل النسوان وتـولد
مـــــلايـيــن
والـغـيـطــــان
تـرمى غـله وفول تلول فى كل رمـيه
تـرمـى تـوم وخـيـار وبـامــيه
والـشـجر يـطرح جوافه وبرتــقان
والعـنب تحت الورق لا خـضر يعنـقد
والبـلح فــوق النخـيل يظهر ويعـقد
لـمـا تـبـقـى الشـمـس حـامـيه
والـزمـن فـات .. فــات سـنـيـن
الـسـنــه تــسـحـب سـنـــه
لــمــا حصَّـــلـنـى أنــــا
ونـا قـاعـد عـلى كـرسى خـرزان
عـلـى قـهـــوه فــى المــيدان
وبــافـكـر فى الحـياه مـن حوالـيا
والـزمــن واقـــف شـــويــه
جـنـب ســاعــة البـلــديـــة
والعـيـال واقــفــيــن كـمـان
زى مـا هـم فى الميدان ما بيـكبروش
والـبـنـات قاعدين وما بيتـجـوزوش
والغيـطـان هنـاك بعـيد تحت السـما
تـحـت عـين الشـمس راقده مسهـمه
ونـا قـاعـد وبـافـكر فى مشاكـلى
والزبــاين كلـهم فـى القهوة شكـلى
كـلهم بيفــكروا
والعــيال واقـفيـن ولا بيفـكـروش
إنما بيـهــزروا
قبــل مـا يسـير الزمـان ويكبـروا
والزمن عايز يسير
ونـا عايـزُه يـنتـظـر وبـاصَبّـره
لـما اقــول لـــه شـىء كتـيـر

يا زمن آه يا زمان
ياللـى طـابع رسـم كفك ع الحيطـان
خمـسه وخميسه فى عين ألعن شيطـان
أنـا شـفـتك وانت ماشى فى الغيطـان
خطـاويك هِيّا السـنابـل ع العـيـدان
خطـاويك فـوق الـدُرَه هى الكيـزان
هِيّا صـوت الفاس بيفتح فى الحيضـان
هِيّا لون القطن لابيض زى قلب الفلاحين
خطاويك الفيضان

أنـا شـفـتـك وانت خـارج م البيبان
فـى الصـبـاح ويـا العيال والشغالين
وانـت مــاشـى ع الـرصــيـف
خـطـاويــك صـوت القـــروش
فـى الكــفوف
فــى خــيـال الـشـقـيـانـيـن
والـعرق فاحت تـرع فـوق الوشـوش
والـعـيـال رايـحــه الـمــدارس
والــفـــبـــارك والــــورش
والاّ بــيــلــمـوا الـسـبـارس
عـلــشـان يـاكـلـوا الـرغـيف
الشـريـــف

وانـــت ســايـر يـا زمـــان
وانــت دايـــر مـــن زمــان
زى مـا تــكـون سـاقـيـه هـايله
قـواديـسـها ف كل لحظة تقـب شايله
ميـه تــجــرى فـى الشـقــوق
والـعـيـدان تخـضر فيها وتبقى خايله
زى مــا تــكـون ساقـيه هايــله
قواديـسـها ف كـل لحـظه تقب شايله
دم يـجــرى فــى الــعـــروق
يـبـقى بنـت عيـونها بحر من العسل
والـشــفـايــف دول عـقـيــق
والـشـعـــور الــســود خُصل
م البــريـــق
والإيـــديــن
تـغـسـل الـقـلـب الـجـريـــح
والقَـمـيـــص والـهـدمـتـيــن
دم يــجــرى فــى الـعـــروق
يـبـقـى واد مــخـلـص جـرىء
واد صـريــح
راســه تـشــبـه للـشـاكــوش
الـوحـــوش مــا تـخـوفـــش
والـجـبـــال مــا تـوقـفــوش
والـزلازل والـجـيـوش ما تكسروش
دم يـجـرى يبـقى شعب كبير … كبير
يأمر الأزمان تسير
والـزمـن فـات … فـات .. سنــين
فــى خيــالى
ونـا قـاعد والميـدان مـلـيان قـبالى
شفـت نـفـسى حـوالـيا عـيال كتار
فاتـت الأيــام وفـاتـت اللـيـالـى
شـفـتـهـم صـبـحــم كـبــار
مـشـيـوا ويــا الـناس فـى عـيد
ونـا ويــاهـم بـاغـنـى الأنـاشيد
واحـنـا شـايــلـيـن الـرايــات
طـايــره ويـا النسـمه ويا الأغنيات
على دقات الطبول
واحـنـا مـاشـيـين فـى المـظاهره
بـنـت مـالت نـاحيـتى وادتنى ورده
ورده حـمـره
قــمــت م الـقـهــوه سـعـيـد
وبــاقــول
بـكـره أجــمــل م النــهــارده

* ديسمبر 1955

بوابات الرحيل


ولمـا عديـت بوابـات الرحـيل
وخرجت م العتبات
اتصـوبت نحـوك عيون الحرس
عيـون عنـيفة بـس من سكات
جـامدة كمـثل النحت فى التماثيل
بتـقول كمثل الغولة فى الحكايات
"يـا شاطر احـمد ربنا يحرسـك
ح تـمـر مـن بـاب سر يفقسك
معـاك سـلاح ح يدق لك جرس
ما معاك سلاح ما يدق لك جرس"
.. وان دق لك جرس
أوعى يا ولدى تخاف
ح يفتـشوك يلـقوا قلم حبر جاف
ولـما عديـت بـوابات الرحـيل
ومرقـت زى السهم فى السموات
لنجـمـك الـعالـى
قـلـبـى انفـطـر
أصـل الــضـنـى غــالـى
ابـنـى الكبـير أول وليـد جالى
مجـنون ومثـالى
رايـح يجـيب الغـرب من ديله
والفـجر من ليـله
"سـكـة سـلامة وخـطــر"
قـالـت عيون الجند والمضيفات
مـن لهـفتى سالت دموعى مطر
وانا مانعنى الطبيب
مابكيش ولو لحـظة فراق الحبيب
ح أقـول لك ايـه
الله يبـارك لك فـى هـذا السفر
يا بوابات الرحـيل
جالك منين الاسـم ده المسرحى؟
يحق لك تفرحـى
عداكـى شاعر شاب .. مثله قليل

تراب دخان

لقيت فى جيبى قلم.
قلم رصاص، طول عقلة الصابع،
معرفش مديت إيدى عايز إيه .. راح طالع،
أصفر، ضعيف، ضايع،
وما بين تراب دخان، وقشر سودانى، كان مدفون،
وكنت ماشى لوحدى فى الشارع،
معرفش رايح فين، لكن ماشى،
والليل عليا وع البلد غاشى،
ليل، إنما ليل أسود الأخلاق.
ليل، إنما عملاق،
اسود سواد خنَاق،
اسود، كمليون عسكرى، بستره خفاشى،
وجزمه ضباشى،
بينظموا السهرة.
الخلق يا حسره،
الخلق مالهاش خُلق للسهرة ..
الخلق عاملين زى عشاق كلهم مهاجير،
ومروحين مقاهير
يستنظروا بكره.
مقهور أنا وماشى
- أصل القمر قال جاى وماجاشى -
ع النيل ماجاشى .. وماجاش كمان ع الهرم ..
لفيت عليه القلعه لفيت بولاق،
قمرى لقيته عدم.
لفيت عليه امبابه والوراق،
قمرى لقيته محاق.
وعنيا وقعوا م السما ع الأرض،
الأرض برضه محاق.
قهاوى، سوده من الهباب والهذر،
والراديوهات تنعب نعيب الجنون.
يا ليله من غير قمر …
يا كحل من غير عيون.
ولقيت فى جيبى قلم،
كأنه واد مقروض ومتجادع،
قُزعه لكين ملعون،
مبرى قوى ومسنون
تقولش ح يخطط نظام الكون؟!
وأعمل بيه إيه وأنا ماشى فى الشارع،
أنا كمان قُزعه وكمان ضايع
وكمان عليا تلول تراب دخان.

يا ميت ندامه عليكو يا صنايع،
سبع صنايع، بس آه يا ندم،
سبع صنايع بس آه يا زمان …
ارسم لى قطه يا بابا ..
ارسم له قطه بتشتغل بهلوان
أكتب لى اسمى يا بابا ..
أكتب له اسمه بخط مرعوش حنان.
ادينى قلمك يا بابا.
اديله قلمى يشخبطه ع الحيطان.
وشيلنى أوبح يا بابا ..
أشيله على صدرى كما الصولجان!
… كان القمر أيامها طفلى أنا،
وعليه زغب ناعم كمثل الطير،
واخضر كأنه لمونه م البنزهير،
وكنت اشيله ، وافرجه لكل حى،
اتفرجوا، شوفوا غلاوة الضنا
والناس يقولوا اسم الله خير والله خير،
يا رب خليه لك ..
الرب خلاه .. بس مش ليا،
ضاع القمر منى وانا غفلان،
وصبحت يا إخوان،
لابد ما يتشحتفوا عنيا
علشان أطول منه شعاع من ضى

وادينى ماشى لوحدى فى الشارع ..
معرفش رايح فين، لكين ماشى،
والليل عليا وع البلد غاشى،
ولقيت فى جيبى قلم ..
كتبت به غنوة عذاب

روحانية


فيك يا حديد روحانية
ان كنت مسمار، والا فاس
ان كنت مفتاح، والا بريمه،
ان كنت سيف، والا إبره،
ان كنت محرات،
ان كنت مشبك شعر،
ان كنت مروحة موتور،
ان كنت مطرقة،
ان كنت سيخ،
ان كنت جنزير خرده فى التراب،
فيك روحانيه ..
عشان ما بين الرب والحديد،
فيه ابن آدم

زى الفلاحين


القمح مش زى الدهب
القمح زى الفلاحـين
عيدان نحيلة جدرها بياكل فى طين
زى اسمـاعين
ومحـمـديـن
وحسين أبو عويضه اللى قاسى وانضرب
علشان طـلب
حفنة سنابل ريَّها كان بالعرق
عرق الجبـين
القمح زى حسين يعيش ياكل فى طين
أما اللى فى القصر الكبير
يلبس حـرير
والسـنـبلـه
يبعت رجاله يحصدونها من على
عـود الفقير


* نوفمبر 1951

سيد درويش


واقف لحد الفجر، باستغفر،
ورا عمود مرمر
مشروخ، وانا شايب،
والخِضْر فات بحصانه من جنبى،
لابس صديرى بالقصب، دايب.
طب الحصان، فطسان، وطلع الفجر…
الفجر كان أخضر،
الأرض كانت ريش نعام بمبى،
القلعه سوده، والبيوت بيضه،
فى كل بين خزنة،
والخزنه مليانه، شِفَفْ نساوين.
نام الأفندى، يئن بالتركى ..
والبياعين بينادوا ع الحنه،
والرعد ساكت،
والنقرزان بينفذ القوانين!.
الشمعه وقعت فى جب،
أول رجب، ألف وميتين هجرى،
عشرين كياك، مصرى ..
أنا كنت سكران، سُكْر شيخوخه،
لكنى دريان باللى حواليا،
اسكندريه الملح غطاهـا،
حبلت، وولدت، ورد على ياسمين،
ولدت حديد على نار،
مِبَيَّضين، على شيالين، على مراكبيه ..
قال اللى قال: حوشوا،
كانت مراكب، أصبحت توابيت ..
رد اللى قال: صلوا على طه،
الواد أبو السيد فى الفنار*
فى إيده ريشه عود،
بيلون السماوات، سحاب، ورعود ..
يا مرحبه!
نزل المطر ع الأهالى،
خرجت جنازتى، الضهر، م الأزهر،
- والضهر كان أحمر -
فتحت انا عنيا
من قبل ما وصل للضريح، وصحيت
على شفتى غنوة صنايعيه،
أبو عرب غناهالى*.

*أبو السيد ، وأبو عرب : كنيتان لاسم سيد

سوناتا -1


أنـا فـى الخـلا، بانـشد ولا بانـام،
صـلـوات غرام، ويا حرام تتـمحى.
الليـله بـل الطــل كـل الكــلام،
ولا مـلام، مـانا الخـلا مطـرحـى

خـلا خـلا، أنـا شِعرى قد الوجود،
وقـدَّها وقـدود، وقـلبـى غـنـى،
كأنه عود، فى الجود ما يعرف حدود،
وحبيـبـته عـواد، وعليـه منحـنى،

طـلع النهار، والشمس من غير غما،
الشـعر شَت وطـار، كـأنـه البخار.
داريـت حبيـبتى عن لهـيب السـما،
وصرخت .. فين السقف، فين الجدار،

أنـا بيت حبيـبتى، وهى بيـتى أنـا،
لـكـن يـا ريـت، يبقالنا بيت م البنا

سوناتا -2


دار الزمـان، فاتـت كمـان سنـه
وإلا اللى فايتين احـنا، ع السنـين؟
فتـنا عليـك يـا كوبرى أمسـنا،
ونـفـسنا فى حاجات، وسرحانين.

فتـنا على عصفور جريح فى ريح،
فـتـنا علـى منديـل يسيـل بُكا،
ع النـبـع فقـنا لسبع، مال طريح،
مِكَـتِّـفـاه حيـه مـلـعـبـكـه.

يـاما نفسنا العصافير تطير سرور،
وتفـحـفح المناديـل عرق، وفـل،
وتلـبـس السـباع عقـود زهور،
والكـل يلـقـى الكـل … لو يطل.

طلينا فى عيون بعض، انا وصديق..
شفـنا الحاجات دى، بحق وبحقيق

سوناتا-3


عربـيتـيـن، مِحَمِّــلـيـن غُنـا،
وصريـخ بنـات، وقهـقهـة رجال..
يـا خسـارة مـاحناش ويـا بعضنا،
نـاس للجـنوب، ونـاس للشـمـال

عربيـتـيـن دول، والا قبضتـيـن،
مـقـسّـمـيـنا، قـسـمـة القـدر،
كأنـهـم أرضـين فـى دنـيتـين…
احـنا بشـر يـا حبيبتى، مش شجر!

جـار بعضـنا فايتـين، نظـرت لك،
عيـونـنا جابـت فى الحلال وليـد،
لـو بـعـدت العربيـتـيـن هلـك،
وهــو بـيـن الشُـبّاكيـن عنـيد...

أنـا بارتـعـش، وانتى … بترجفى!
بـس الـولـد، بايـن عليـه عفـى

سوناتا-4


"وفرشت عشى ريش فى ريش فى ريش،
ومْشـاغْلَه، وتْوشْـويش، وصـوْصَـوه..
سـوا سـوا ح نعـيش نعـيش نعـيش،
نعـيش نعـيش، نعـيش نعـيش، ســوا

لسـاه يـا عصفور الربـيع مـا جـاش،
عمـال تشقـشق، واحـنا فـى الشـتـا؟
شـجـر الشـوارع لسـه مـا انكساش،
ولا مـنـه فـتـفـوتـه، مـنـبِّـتـه!

"أنـا أغنـى صيف شـتا ربيـع خريف،
أغنـى .. غـنـوة خـضـرا ع الـدوام
ورق الشـجـر يـقـع، علـى الرصيف،
وانـا، والغـنـا، مِتْـشـبِّـكـين تمـام

عنـدك يـا عصـفور يـا بنى، ألف حق.
الريـح مـا بتـوقعـش غيـر … ورق

سوناتا -5


من يوم ما شَفـنى طبيب ورا طبيب،
وقـالو لـى: خـد بـالك...ويلزمك...
بقـيت أخاف م الشِعر، خوف رهيب،
زى الحليـب، والخـمـرة، والسمك.

يـاليل يـا ليل .. لألأ .. بلاش بلاش
يا عيون حبيـبتى ... لأ يا واد تموت،
اسكـت سكوت، وارقد على الفِـراش
أحـسـن ما تـرقد داخل التـابوت.
يا مصر.. لأ.. يا مصـر آه يا مصر،
يا عيون حبيبتى، العصر فى الغيطان،
أهواكـى.. آه، عصرت نفسى عصر،
فـى هـمـسة المـحبـة والحنـان

بقـيت أخـاف م الشـعر .. بس آه،
الشـعـر مـوت، أحـلى من الحياة

سونات-6

بـتـهـز راسـك لـيـه وتبـتـسـم،
يـا غـراب، فـى ضل جنينتك التراب
مـن ضحـكـتك وسـطك ح ينـقسم،
اطلـقـها عاليه، وقول: خراب. خراب.

برضـك بتضـحـك، تحـت سـرتك،
وعـيـنـيك بتـتغـامز لبـعـضها؟..
مـلعـون أبـو الفكـره اللـى سـِّرتَك،
ملـعـون سـماهـا الشوم، وأرضـها

"الدنـيـا هـى الدنـيـا" مـش كده؟
الدنيـا يـا غـراب هـى هـى، نعـم:
كـرمة سـكـارى العـشـق والفـدا،
وسـريـر ولادة الحـلـم والـنـغـم!

اضحك وأنا ح اضحك، وشوف يا بين ..
ميـن ضحـكـتـه تـوصل لحد فيـن

سوناتا -7


وقـالـوا طَفّوا النـور حصـل هجوم
طَفـيـنـا كـلــه بـس للأســف
قـلـبـى المضىء بالحب كالنجــوم
لـمـع ف قلب الضَلّمَـه وانـكـشف

هـدف مـبـاشـر جـت لـه قنـبلة
جـالـه الـنابالـم ادّالـه لـون كئيب
اسـود كـأنـه وصـمة مخـجـلـة
أو حـرق خـتـم معـتـقل رهـيب

وقـالـوا روح لأطـبـة السوفيـيت
حضـن الصـديـق عـلاج لكل داء
فى مـوسكو خدنى ف حضنه كل بيت
مـا فضـلش غير خطوة على الشفاء

يـا أصدقـاء آسـف لكيـن مُحــال
مـاليش دوا غيـر طـرد لاحتــلال

شدوان


كان ياما كان وعلى مدى الأزمان
بلد وكانت أول البلدان
بكرية الدنيا لكين صلى ع النبى
كانت ترضع امها الألبان
من قبل منها الأرض عاشت سداح مداح
تسكنها أشباح ناس على حيوان
وشعرها منكوش ولا عارفه إسمها
والعقل غايب والكلام هذيان

الا وتطـلع جنـب نيـل مصر للعجب
مخالـيـق تقـيس الأرض بـالـفـدان
تعـمل بيوت لها سقـف ومـحل للأدب
وفـرن عـيـش ومـرايـة للنـسوان
تحـسب بـروج النجم والشمـس والقمر
وتقـول ح ييـجـى يـوم كذا الفيضان
تبـرى القـلام البسـط وتخط ع الورق
جـوابـات حـكـومـة وفلسـفة وبيان
تمـان تـلاف عام كل عام الف تجربة
ولـكـل تـجـربـة ألـف ألف ميدان

يـا مفتـحين العـين كـلامى يسركـم
ويـا غفـلانـين نشـوا علـى الدبـان
ولا كـل مـن لـها خارطة قالت أنا بلد
الرك ع المـدنـيــة والـعــمـران
وعـمـار يـا مصر عمار بنيلك وأمتك
عـمـار بـأفـراحـك وبـالأحـزان
آدى اللـى دم الجنـدى ع الصخر أثبته
بحروق من النـار فـى نهار شـدوان

على إسم مصر


النـخـل فـى العـالـى والنـيل ماشـى طوالى
معـكـوسـة فـيه الصـور .. مقـلوبة وانا مالى
يـاولاد انـا ف حـالـى زى النقـش فى العواميد
زى الـهـلال اللـى فــوق مـدنة بنـوها عبـيد
وزى بـاقى العـبـيد باجـرى عـلى عيـالــى
بـاجـرى وخـطـوى وئـيـد من تقل أحـمالى
محنـية قـامـتى .. وهـامتـى كـأن فيـها حديد
وعيـنـيا رمـل العـريـش فيـها ومـلح رشيد
لكـنى بافـتـحها زى اللـى اتـولـدت جـديـد


على إسم مصر

مصر .. التلات احرف الساكنة اللى شاحنة ضجيج
زوم الـهـوا وطـقـش مـوج البـحـر لما يهيج
وعجيـج حـوافـر خـيـول بتجـر زغروطـة
حـزمـة نغم صعب داخـلة مسامـعى مقروطـة
فى مسـامى مضغوطـه مـع دمـى لها تعاريـج
تـرع وقـنـوات سـقت من جسـمى كل نسـيج
وجمـيع خيـوط النسـيج عـلى نبـرة مربوطـة
أسمـعها مهـموسـة والا اسمـعـها مشخـوطـة
شبـكة رادار قلـبى جـوه ضلـوعى مضبوطـة

على إسم مصر

وتـرن مـن تـانى نفـس النبـرة فى ودانــى
ومـؤشـر الفـرحـة يـتـحرك فـى وجـدانـى
واغـانـى واحـشانـى بـاتذكرهـا ما لهاش عد
فيه شىء حصـل أو بيحـصل أوح يحـصل جـد
أو ربـمـا الأمـر حـالــة وجـد واخـدانـى
انـا اللـى يـامـا الهـوى جـابنـى وودانــى
وكـلام عـلى لسـانـى جـانـى لابـد اقوله لحد
القمـح لـيـه إسـمـه قمـح اليـوم وأمس وغد
ومـصـر يـحـرم عليـها .. والجـدال يشـتـد

على إسم مصر


ولما زمانى رمانى عليل
نسيت كل شىء عن حبيـبى الجميل
لكن هو أبـدا
انا مانساهوش
نسيت مشيته وصوته كان شكـله إيه
ورسمة شفايـفه
ولمـسة إيديـه
نسيت نظـراته
نسيت لون عينيه
وقوس الحـواجب وسهـم الرموش
لكن هو أبــدا
انا ما انساهوش
نسيت إسمه وحكايـته وعرفـته فين
وعشنا سوى العمر
والا يومـين
وكان م البشر
والا طير بجناحين
نسيت حتى كان له وجود أو مالوش
لكين هو ابـداً
أنا ما انساهوش


قطـعوا الأغـانـى وطـارت نشـرة الأخـبـار
دارت عـلى كـل دار فـى الكـوكـب الــدوار
يـا حاضـرين اعلـموا الغايبـين بأنـه فى مصر
اتغـير الاسـم منـذ الآن فأصـبـح .. مصــر
ضـحك التاريـخ ضحكـته المشهـور بها واندار
ودخـل مناقـشة مـع الجـغرافـيا عـما صـار
هـل نعـترف بالبـيـان اللـى أذيـع العـصـر
أم ننـتـظر مصـر تـطـرد اسرائـيل بالقسـر
وسـاعتـها تحـصل بكـل جـدارة يـوم النصر

على إسم مصر


عـلى إسـم مصـر التـاريـخ يقدر يقول ما شاء
أنـا مصـر عنـدى أحـب وأجـمـل الأشـيـاء
بـاحبـها وهـى مالـكه الأرض شـرق وغـرب
وبـاحـبها وهـى مـرمـيـه جـريحـة حـرب
بـاحبـها بعـنـف وبـرقـة وعـلى استـحيـاء
واكـرهـهـا والـعـن أبوهـا بعـشق زى الداء
واسيـبها واطفـش فى درب وتبـقى هى ف درب
وتلـتـفـت تـلقـيـنى جنـبـها فـى الكـرب
والنبـض ينفـض عروقـى بألف نغـمة وضرب

على إسم مصر


مصـر النسـيم فـى اللـيـالـى وبياعـين الفـل
ومـرايـة بهتـانة ع القهوة .. أزورها .. واطـل
القـى النـديـم طـل مـن مطـرح مَـنَا طَلّيـت
والـقـاهـا بـرواز معـلق عنـدنا فـى البـيت
فيـه القـمـر مصـطفى كـامل حبيـب الكــل
المصـرى بـاشـا بشواربـه اللى ما عرفوا الذل
ومصـر فـوق فـى الفـراندة واسمـها جوليـيت
ولـمـا جيـت بعد رومـيو بربـع قـرن بكـيت
ومسـحت دمـعى فـى كمى ومن ساعتها وعيـت

على إسم مصر


مصـر السـمـا الفـزدقـى وعصافـير معديـة
والقـلـة مـمـلـيـة ع الـشـباك .. مـنـديـة
والـجـد قـاعـد مربـع يـقـرا فى الجرنــال
الـكاتـب المـصرى ذاتـه منـدمـج فى مقـال
ومـصر قدامـه اكـتـر كـلمـة مـقـريـــة
قـريـتـها مـن قـبـل مـا اكتب اسمى بإيديـا
ورسـمـتـها فى الخـيال على أبـدع الأشكـال
ونـزلـت أيـام صبـايـا طـفـت كـل مجـال
زى المـنـادى وفـؤادى يرتـجـف بـجــلال

على إسم مصر

رحيلاً رحيلاً بغير هوادة
رحيلاً فإن الرحيل سعادة
عبادة
إرادة
سيادة
ولادة
رحيـلا .. إلـى أيـن ليـس يهـم
ولـيـس يهـم بـأى وسـيـلة ....
أجـيـراً بلـقمـته فى البواخـر…
عـلى واحـد من جياد القبـيلة .....
عـلى مقـعد فى ذرى الجو فاخـر
وتـملأ لـى الكـأس بنـت جميـلة
عـلى قدمى .. أو بفكرى .. أهاجـر
أبادر
أغادر
أخاطر
أسافر
ولكـن إلـى أيـن .. ليـس يـهـم
إلى حيث لا تعـبر الأفـق شمـس
إلى القـطـب .. أو حلقة الاستواء ..
إلـى حيـث يسـمع للـجن همـس
إلـى باطن الأرض أو فى الفضـاء
إلـى مرفـأ الغد .. أو أرض أمـس
أرى كـل شـىء ومن أيـن جـاء
وأفـعـل مـا قــالـه القـدمـاء
من الفقراء
أو الحكماء
أو الأمراء
أو الأشقـيـاء أو البلهاء فليس يهـم
لقـد قـيل وهـو الكـلام المـهـم
اللـى يعـيـش يـامـا يـشـوف
واللـى يـمـشـى يشـوف اكتـر.

شـفـت الجبرتى بحرافــيش الحسـين وبـولاق
ابـن البـلد ماشـى زى النـمس فـى الأسـواق
بالفـلاحـين ع المـداخـل مـن بعـيد وقريـب
بالأرنـؤوط بالشراكـسة بـكـل صـنف عجـيب
مترصصين سور رهيب مزراق فى ريح مـزارق
كـأنـهـم لا بـشـــر ولا خـلـقـة الخـلاق
ومـصر فـلاحــة تـزرق بين رقيب ورقـيب
من غيـر أبو الهول ما ينهض ناهضة شايله حليب
والصـبح بـدرى الجـبرتـى ينـام وقلمه يسـيب

على إسم مصر


مصـر اللى عمـر الجـبرتـى لم عرف لها عمر
وطـلـع لقـاها مكـان مـليـان عـوام وزعـر
جعـيديـة غوغـاء يجيـبوا تمـلى وجـع الراس
وخليـط أفـارقـة هنـادوة روم مـلل أجـنـاس
والتـرك فـى القلـعة والمماليك خدودهـم حـمر
كـان عمـرها ستـلاف سنه .. كلها سنين خضر
بـس الزمـان يختـلـف زى اخـتـلاف الـناس
نـاس تبـنى مجـد وحضـارة وناس بلا احساس
ونـاس تـنـام لمـا يزحـف موكـب الأحـداث

على إسم مصر


أنـا اللـى اسـمى حتـحـور .. أنـا بنـت رع
مـثـال الأمــومـــة ورمــز الحــنــان
تـفـيـض حلـمــاتـى وتـمــلا الـتــرع
وتـسـقى البـشـر كـلـهـم والـغـيـطــان
أنــا ربـــة الـحــب حـتــحـور أنــا
أنــا الـسـيدة الـمنـجـدة الـمـغـرمـيـن
وكـم مـن مـحــب ف هــواه انـضـنــى
دعــانى وطـيـبـت خـاطــره الـحـزيـن
أنــا طـيـبــة انـمـا طـبـعـى صعــب
وديـــعه. ولـو ثــرت بـطـشى مـهــول
مـا اشـوفـش اللـى قـدامـى لـو ألـف شعب
أدوســهــم وتــجــرى دمـاهـم سـيـول
ويـوم رع مـا فـات بـسـنـاه فـى الـسـمـا
وكـل الـعـيـون خايـفــة تـنـظـر الـيـه
وجـالـه الـقـمـر خـلـقـتـه مـعـتـمــة
وعــدى قــصــاده .. وضـلـم عـلــيـه
يــا ويـل اللـى فـتـّح فـى ابـويـا العـظيم
يـا ويــل مـن تـطـاول يـا ويل من ضـحك
يـا ويـلـك يـا مـصـر مـصـيـرك الـيـم
أنـا اللـى اسـمـى حـتـحـور انا ح امسـحك
يـحـاول يـهـديـنـى رع مـا اسـمـعـوش
وادمـر واطـيـح فـى الـبــلاد والـعــبـاد
أنــا الطـيــبـه .. كـنـت زى الـوحـوش
سـفـكــت دمــــاء الـبــنـات والـولاد
دبـحـــت الـمحــبـين فـى عـز القـبـل
هـدمـت الـمـعـابـد عـلـى الـمنـشــدين
قـلـبــت عـلـى الـنـحاتـيــن الـجـبل
حـرقـت الغــيـطـان هـم والفــلاحيــن
لـحــد مــا رع نـــادى ع الآلــهـــة
وقــال صبــوا فــى الـنـهـر كـل النبـيذ
وشـفـت المـيـاه حـمـرا ومـزهـزهـــة
وظـنـتـيـهــا دم الـضـحـايـا الـلـذيـذ
شـربـت انـتـقـامـاً شـربـت شـربـــت
وأنــا بـالـعــن الـمـفـتـرى والـغـبـى
وحـبـة بـحـبـة عـن الـوعـى غـبـــت
ونـمـت عـلـى الـنـيـل فـى ضـى أبــى
وقـمـت .. بـكـيـت مـن فـؤاد أم ثـكـلـى
ونـهـنـهـت فـوق صـدر مـصـر العـريض
عـلـى الـعـالـم المـبـدوريـن جـنـب قتلى
وكـان دمـعـى يـنـصـب فـى النـيل يفيض
واقـول لـيـه يــا مـصـر ولادك كــــده
يـــا إمـــا الـمـذلـه يـايـتـجـبــروا
يــا خــوفـــى يـا فـرحـة قـلوب العدا
ويـا نـدمـى لـــو مــا يـتـغـيـــروا
ومــن يـومـهـا والنـيـل فـى نـفس المعاد
يـفـيـض كـل عـام قـبـل فـصـل الخريف
بـلــون حـمـرة الـدم يـمــلا الـبــلاد
ويـمـلا الـنـسـايـم بـعـطـر نـحـيــف
بـعـطـرى أنــا اللـى اسـمـى حتـحور انا
وعـطــرى نـحـيـف وحـنـون وطــرى
يـفـرح بـس مــرة فـى كــل سـنــــة
ويـهـمـس يـا مـصـر اذكـرى .. واحـذرى
نـهـايـتـه مـصر اللى كانت أصبحت وخلاص
تـمـثـال بـديـع انـقلب وانفه فى الطين غاص
ونـاس مـن الـبـدو شـدوا عـليه حبال الخيش
والقـرص رع العـظيـم بـقى صاج خبيز للعيش
وسـاق مـحـارب قـديـم مبتورة ف ابو قرقاص
مـا تـعـرف اللـى بـترها سيف والا رصاص
والا الخـراب اللـى صـاب عقل البـلد بالطـيش
قـال ابـن خـلدون أمـم متـفسـخة تعيش ليش
وحـصـان عـرابـى صهل صحى جميع الجيش


على إسم مصر


حـصـان عـرابى جـميل حصان عرابى أصيل
حصـان عـرابـى رشـيـق القـد ديـله طويل
يسـهر مـع الخـيل طـول اللـيـل يـتـكـلـم
ويـقـول أراء رغم إنــه مـاكـانـش متـعلـم
ويـقـف فـى عـابـديـن وياخد زاوية البروفيل
للـرسـاميـن يرسـموه ونشـوفه جيل ورا جيل
ويـعـدى كـالـريـح عـلى المجاريـح ويسـلم
وحـافـره ع الصـخـر فـى التـل الكبـير عَلِّم
ولـمـا صـابـه انـفـجـار القنـبـلة اتـألـم

على إسم مصر

والمـس حـجـارة الطـوابـى وادق بكـعـابى
يـرجـع لـى صـوت الصـدى يفكرنى بعذابـى
يـا مـيـت نـدامـة عـلى أمـة بـلا جـماهير
ثـورتـهـا يـعمـلهـا جيشها ومالها غيره نصير
والشـعـب يـرقـص كـأنـه عـجوز متصابى
إنـهـض مـن الـقبـر احـكى القصة يا عرابى
يـطـل فى رافـع الطـهـطـاوى م التـصاوير
شـاحـب ومـجـروح فى قلبه وجرح قلبه خطير
وعيـونـه مغـرورقـين بيـصبـوا دمـع غزير

على إسم مصر

مالـك سلامـتـك بتـبكى ليـه يـا طهـطـاوى
قـال لـك عـرابى .. انكـسر بسـلاح أوروباوى
وسـلاح أوروبـا مـاهـواش الـمـدافع بــس
ده فـكـر نـاقـد مـمـيز للـثـمـين والغـث
قـلـناهـا مـيـت ألف مرة بصوت جهير داوى
بـس الحـمـاقـة لا ليـهـا طبـيب ولا مداوى
ولا حـد م الخـلـق بالخـطر اللـى داخـل حس
الغـفـلانـين اللـى خـلوا العـقل صابـه مَـس
قـالـوا الخـطـر هـو فـكـر أوروبا لو يندس

على إسم مصر
أحـسـنـت فـى القـول صحـيح يا ولد يا متنبى
جـبـت اللـى جـوه الفـؤاد عـن مصر متعـبى
وحكـمـت بالـعدل لـكـن بعـضـنا انـظلموا
"يــا أمـة ضـحـكـت مـن جـهـلها الامم"
العـلم كـان عـنـدنـا مـن صـغـره متـربى
لكـنـه هـاجـر وعـدى البـحـر مـتـخـبى
لمّـا الإيـران هـجـمـوا ثـم اليـونـان هجموا
ثـم الـرومـان دمـروا ثـم التـتار هـدمــوا
ثـم الجـميـع كـل واحـد جـه مـسـح قدمـه

على إسم مصر

على إسم مصر الجزء الثانى


أنـا الـذى مشـيـت ادور باشتـيـاق وحـنـيـن
عـلى مصـر .. والمشى خدنى من سنـين لسنـين
لـحـد مـا سنـينـهـا وسنيـنـى بـقـم واحـد
وعـاصـرتـهـا يـوم بيـوم لم فاتـنى يوم واحد
وحضـرت شـاهد عيـان مـولد ومـوت ملايـين
مـا زعلـت مـن كلـمة قـد البركـة فى الجايين
مـيـن هـم دول يـا جـدع .. مـا توحد الواحـد
البـركـة فـيـنـا وفـى السـامـعـيـن بالواحد
انـا قـلـتـها بـنرفـزة .. مـن غيـرة الواحـد


على إسم مصر

مـصـر الـرمـال العـتـيـقة وصهدها الجـبار
والنـيل كـخرطـوم حريـقة وحيد فى وسط النـار
فى إيدين بشـر نـمـل رايـحه وجـاية ع الضفـة
فيـهـم مـطـافـى وفـيـهـم كـدابـيـن زفـة
وفيـهـم اللـى تـعـالـى وقـال انـا حـكمـدار
وكـل بـاب م البـيـبان مقـفـول عـلى اسـرار
وكـل سـر بـحـريـقـة عـايـزه تـنـطـفـا
مـن أهـلـى تـنـدهـلى وتقـوللـى تعـا اتـدفا
انـا اللـى عمـرى انـكـتـب الـى يوم ما اتوفى

على إسم مصر

عـلـى إسـم مصـر ارفـعـوا الانـخاب واملولى
شـدوا الـوتـر ع القـمـر يـا شبـاب وغـنـولى
نسـكـر عـلى حبـهـا بـالـفـن والاحـسـاس
نـسـكـر ودمـع الحـمـاس يـملا لنا تانى الكاس
احـنـا يـا حـلـوه الفـدا بـس اطـلـبى وقولـى
يـا سـمـره بـعـيـون كـده وسـنـتـك لـولى
وغـنـوه الـحـب تـعـلا ويـسـمـعوا الحراس
يصـفـروا ويـحـضـروا بـفـرقة طبول ونحاس
ويتـقـفـل سـجـن مصـر امـام عيـون النـاس

على إسم مصر

والمطـبـعـة تـدور وتـخـطـف كل إيد منشور
عيـش لسـه م الفـرن طـالـع ريحته ريحة النور
يـا فـلاحـيـن يـا جـنـود يـا طلـبة يا عمال
عـدوكـم حـلـف لاستـعـمـار ورأس الـمـال
عـاش الطـريـق لشـتـراكـى قوم يا شعب وثور
وحـكـمـكـم حـكـم اقـطاعـى عميل مأجـور
عـاش الكـفـاح بالسـلاح إلـى القـنال يا رجال
خـلـوا حـيـاة لنـجلـيز المـسـتـقـرة محـال
والشـمـس نـامـت ليـلتـهـا وفـكـرها شغـال

على إسم مصر


الـقـاهـرة فـى اكـتـئاب والأنـس عنها غـاب
مـن عتـمـة تـدخـل لـعـتمة كأنها ف سرداب
أو قـريـة مـرمـى علـيـها ضـل هـجـانـة
الـخـطـر م المـغـربـيــة بـأمـر مـولانـا
ومـصـر فـى اللـيـل بـتـولد والبوليس ع الباب
صـبـيــة ولادة يـابــا ولـحـمـهـا جـلاب
طـلـع الـصـبـاح زغـرطت فى السكة فرحانـة
عـلى كتـفـهـا مـولـودتـها لـسـه عـريانـه
وف لـحـظة كـانـت جمـيـع الدنـيا دريـانـة

على إسم مصر

عـلى كتـفـهـا مـولودتـهـا وتجرى وتـنـادى
يـاولادى مـن يـوم مـيــلاد الأرض يـاولادى
يـنـهـض لـهـا امـحـتـب بـدواه يـقـويـها
وبـنـتـاؤور ينـشـد الاشـعـار يـهـنـيـهـا
وسـعــد زغـلـول يـكـح يـزلــزل الـوادى
وعـرابـى يـهـمـس ومـصـر تـرد بتـمـادى
تـقـولـه آه بـرضـه ثـورة جـيـش وح احميها
بالـدم بـالـروح بـكـل حيـاتـى ح افـديـهـا
امـا الأسـامـى مـعـنـديـش غـيـر اسـميها

على إسم مصر

مـولـودة كـبـرت وشـبـت فـى تـلات تـيـام
مـن هـبـة هـبـت .. لـثـورة لـبـت الاحـلام
والـعـرض عـام راح ايـطـاليا بعيد ورا البراميل
يـا هـلـتـرى دى حـقـيـقـة والا وهم جمـيل
ومـصـر مـن إمـتـى كـانـت حـظـها بسـام
ظـهـر قـمـيـص العـرق متـشـمـر الاكـمام
انـا شـفـتـه عـقـلى بـرق وبـدأ لصاحبه يميل
نقـشـت لـه ف قلـبـى احـلـى وأروع التماثيل
بـدراعـى والـمـطرقـة وبـإيـدى والأزمـيـل

على إسم مصر

* كتب هذا الجزء من ملحمة على اسم مصر بعد عودة الشاعر من موسكو فى خريف 1971. وهذا الجزء لم يكتمل

غنوة برمهات



حسيت به فى ضلوعى، كأنه الحليب،
فى بِز مطروده بلا طفلها،
الدمع، لأ ده الدم، لأ ده اللهيب،
لأ ده الكلام، أحمر، ملعلع، رهيب،
كما شمس عز الصيف، يتقدح صبيب
آه يا لهيب زعابيب بؤونه وأبيب،
أنا صدرى قلعه نحاس،
صهدت على الحراس
داخوا،
ولما زاد الصهد، ساح قفلها.
ملعون فى كل كتاب يا داء السكوت،
ملعون فى كل كتاب يا داء الخرس،
الصمت قضبان منسوجين عنكبوت،
يتشندلوا الخَيّالة فيه بالفرس
يتشندلوا الخَيّالة، واشحال بقى،
عصافير غناوى ملونه رقيقة،
حياتها فى الزقزقة.
وانا قلبى طير خير، ان ما غَنّاش يموت،
آه يا حلاوتك يا نسيم شهر توت،
القفل ساح فى الصيف خلاص وانهرس.
رفرف يا طير قلبى، على بيوت بيوت
.. قول للى فى البيت اللى بلا لبلاب ولا ياسمين،
يا ام العيون اللى كلامهم رزين،
والشفتين اللى ابتسامهم حزين،
يا صاحبة الحيرانين،
صاحبك يحبك، من سنين، من سنين.
وحياة ليالى الحنين،
والفجر والسهرانين،
والصبح والعشْمانين،
والضهر والعرقانين،
والعصر والتعبانين،
والمغرب المرعب، وما فيه من عذاب مجانين ..
ما ودعك صاحبك، ولا خان هوى،
ولا من هلاك الحب قال يا نجا،
مهما انضنا وابتلا،
ولا عمره قال يا أنا،
تشهد عليه الأرض قبل السما،
أنه أمين،
وعلى العشش، وعلى الحوارى الغواط،
يا قلبى لما تروح،
ما تروحش لا بلبل، ولا وطواط،
روح زى ما انت، قلب له ألف عين،
وألف ودن، وألف ألف لسان.
ولو فى شهر القهر، طوبه الجبان.
اسمع وشوف الهم طالع منين ..
يا قلبى يا مليان،
قول للى فى البيت الصفيح، افتحوا،
صاحبكم الغايب رجع، صحصحوا،
صاحبكم اتلطَّم كثير،
اصفحوا.
يا ساكنين الصفيح،
استبشروا وافرحوا.
أنا مانيش المسيح،
علشان أقول لكم،
طوبى لكم غلبكم،
لكنى باحلف لكم،
باحلف بكم .. وباقول ،
الدنيا كدب ف كدب، وانتوا بصحيح.
حسيت به فى ضلوعى، كلفح الهجير.
فَكِّيت زراير صدرى – مش بَغْدَدَه –
صدرى ما زال مليان بتنهيد كتير.
تنهيد، وطَرْق حديد، وأناشيد فدا.
هات يا برمهات الربيع، والعبير،
والخضره، والعصافير، ودود الحرير …
هاتهم هنا يشوفونى من غير قناع،
أنا اللى قلبى استطاع،
يِعَدّى من أمشير أبو الزمهرير،
ويجيلك انت يابرمهات، يا نضير، يابو شمس ..
زاعق ما يعرفش همس

صديق عمرى


عشرين سنة
عمرى أنـا
أنا العجـوز الشـايـب الـحـزين
أنا العجوز من غير ما تمضى السنين
أنـا العـجوز من قبل سن اربعـين
عمرى النهاردة
رغم المرار ده
فى عمر وردة
عشرين سـنة
كانـلى صديـق وكان حبيب عمرى
هو اللى علمـنى المشـيـب بـدرى
حضـرت مولد كل شعـراية بيـضا
عبـرت سوالـفه كما الشهاب تجرى
كما بـرق سيف الحق فى الهيـضا
وسط الظلام تبرق هـلال هجـرى
تحـسب تاريخ الكون حقيقة ومجاز
كالأبـجـديــة بالقـلـم لـردواز
بالـشـعـر لابـيـض كان يعلمنى
أسـتاذ تـاريخ وفـى التاريخ أستاذ
قابلـته مـن عشريـن سنة وكلمنى
وانـا لسـه باحـبـى فـى الظلال
عـلمـنـى مشـيـة الـرجــال
سلـمـنـى رايــة الـنـضــال
ولـحـد هـذا الـيـوم .. بيـلهمنى
وخـيـالــه كل ما اقـع يقـومنى
وكـل مـا اتبـعتـر يـلـملمـنى
وانهـض واقـوم بـأمـل جـديـد
وبقـلب أقـوى مــن الـحـديـد
ولـيد .. عـجوز .. شايب .. حزين
وعـمـرى عـشـريـن ســنـة

يا وحوى

ومـن حـوارى " الحسين " راحو اشتروا الطرشى

خيـار ولفت وبصـل ولمـون قديـم مـحشـى

فوق البوفيـه رصـوا برطماناتـه ولاسـاعشى

أحمـر وبنـى وبمبــه وعنبـرى واصـفـر

ويومين يا دوبـك ده كلـه يـروح مـا يـرجعشى

السـمن نـازل يـرف . . وكانـوا جـايبين كوم

والبيت معبـأ بريحـه قـلى طــول اليــوم

فيشـاوى بالليـل ومـن بـدء النهـار النـوم

ولا شـغله ولا مـشـغلة غير بـس " ياوحوى "

والـكل فاطـرين ياعينـى ولم لهم فى الصـوم.

نهـايـة الأسطـورة


أدى نهــايـة الكبـــــر والمبـــاهـاه
والكـــدب لمـا يصـــدقـه اللـى رمـاه
لحـد مـا الصــدمـة تجـى مــداهمــاه
ومحـولـة الخمــــرة إلـى مقـــايـاه
وممــرغـاه ينــدب علـى قتـــــلاه
بنـى إســـرائيـل العقــــل منهم تـاه
فى متـــاهـة الأسـاطيـــر يـا ولـداه
والحقـــد ضـيع رشــدهـم وطفـــاه
خلطــوا ما بين البطـــش والمعـــاناه

واحتــاروا : هم غــلابا والا عتـــــاه
شعـب اتلعــن م الـــرب والا حــابـاه
والـــــرب رب الكــــــون والا أداه
مخصـوص لهـم ؟ سبحــانـه فى عليـاه
الـرد جــالهم يعـــدل المــــوازيـن
على أيـد جنــود من مصـــر ، بنى آدمين
لا مختــارين م المـــولى ولا مـلاعين
بس الـوطـــن لابـد يحمــوا حمــاه